Shu yilning 22-26 mart kunlari Osiyo mamlakatlari bo‘ylab 23 yoshgacha bo‘lgan futbolchilar o‘rtasida Osiyo chempionati yo‘llanmalari uchun saralash bahslari bo‘lib o‘tdi. Kelasi yili Tailandda o‘tadigan qit’a chempionatida ishtirok etadigan 16ta jamoaning nomi aniq bo‘ldi.

Osiyo chempionatining final bosqichi 2020 yilning 8-26 yanvar kunlari oralig‘ida bo‘lib o‘tadi. Unga Tailandning Bangkok shahridagi "Rajamangala" (49722 muxlis) va "Milliy" (19793) hamda Patum Tani shahridagi "Tammasat" (25000) va "Leo" (10114) stadionlari mezbonlik qiladi.

Ushbu musobaqaga qur’a tashlash marosimi bo‘lib o‘tadi va jamoalar 4tadan 4ta guruhga taqsimlanishadi. Qur’adan avval jamoalar 4ta savatchaga ajratiladi. O‘zbekiston U23 terma jamoasi Osiyoning amaldagi chempioni hisoblanadi. Shu bois, jamoamiz 1-savatchadan o‘rin oladi. Tailand terma jamoasi musobaqa mezboni sifatida 1-savatcha orqali "A" guruhidan o‘rin oladi. Shuningdek, avvalgi 23 yoshgacha bo‘lgan futbolchilar o‘rtasidagi OCHda finalga chiqqan Vyetnam va yarim finalgacha yetib kelgan Qatar ham 1-savatchadan o‘rin olishdi. Demak, O‘zbekiston bu jamoalar bilan bir guruhdan o‘rin olmaydi.

Savatchalar tarkibi esa quyidagicha:

1-savatcha: Tailand, O‘zbekiston, Vyetnam, Qatar.
2-savatcha: Janubiy Koreya, Iroq, Yaponiya, KXDR.
3-savatcha: Xitoy, Avstraliya, Iordaniya, Saudiya Arabistoni.
4-savatcha: Suriya, Eron, Birlashgan Arab Amirliklari, Bahrayn.

Chorak finalda "A" va "V" hamda "S" va "D" guruhlarida 1 va 2-o‘rinni egallagan jamoalar o‘zaro to‘qnash kelishadi. Ushbu musobaqada dastlabki 3ta o‘rinni egallagan terma jamoalar Tokio-2020 yo‘llanmasiga ega bo‘lishadi. Agar Yaponiya guruh bosqichi va chorak finaldan muvaffaq o‘tsa, u holda yarim finalga chiqqan barcha jamoalar olimpiadaga yo‘l olishadi.