Futbolimiz reglamentida legioner futbolchilar uchun qo‘yilgan talablar bor.
Xullas, kimdir xorijdan futbolchi olib kelsa, avvalgi mavsumda nima karomatlar ko‘rsatganini hisoblab chiqish kerak. O‘sha karomatiga qarab klublar legioner futbolchi uchun badal puli to‘lab beradi. Kimdir 20 million, kimdir 100 million.
Kelasi mavsumdan boshlab mana shu talablarni to‘liq olib tashlab, faqatgina 100 millionlik badalni qoldirish kerak, degan fikr bor. Olib kelinayotgan legioner saviyasi PFL emas, klub muammosi bo‘lishi kerak. O‘sha legioner talabga javob bermasa, muxlislar ham PFL qayerga qarayapti deb iddao qilmay, sprosni klub rahbarlaridan so‘rab oladi. Chunki legionerlarni PFL majburlab olib kelmaydi. Klub rahbariyati esa transfer bozoridagi harakatlari uchun to‘liq javobgar bo‘lishi kerak.
Otkat? Shu ishni qaysidir klub rahbari qilmoqchi bo‘lsa, har ikki holatda ham qilaveradi. Buning uchun ham ularning o‘zi javobgar bo‘lishi kerak.
Talablarni yanada kuchaytirish? Dahshatli talablar qo‘yish mumkin. Hatto legionerlarni faqat xususiy klublar uchun qoldirib, qolganlariga taqiqlasa ham bo‘ladi. Biroq taqiqlar bilan nimagadir erishish mumkin ekaniga ishonmayman. Qachondir klublar ham har bir ishi uchun javobgarlik hissini tushunib yetishi kerak chamamda.
Diyor Imomxo‘jayev
