“Qo‘qon-1912” futbol klubi Qo‘qon shahrida o‘z muxlislari bilan uchrashdi. Uchrashuv Qo‘qondagi “Markaziy” stadionida bo‘lib o‘tdi.
"Qo‘qon-1912" jamoasining futbolchilari va jamoa rahbariyati muxlislaring olqishlari hamda jamoa gimni sadolari ostida stadionga chiqib kelishdi.
Dastlabki so‘z jamoa prezidenti Baxtiyorjon Tolipovga berildi.
“Assalomu alaykum, hurmatli futbol muxlislari. Bugun sizlar bilan uchrashib, an’anaga ko‘ra yangi mavsum oldidan jamoamiz safiga kelib qo‘shilgan yangi o‘yinchilarni tanishtirish hamda siz azizlar bilan fikr almashish uchun bu joyga yig‘ildik. Kelayotgan mavsumga tayorgarlik ko‘rishda murabbiylarimiz juda katta hajmdagi ishlarni amalga oshirishdi.
O‘ylaymanki siz aziz muxlislarni o‘zlarining chiroyli o‘yinlari va g‘alabalari bilan xursand qila oladigan tarkibni jamlay oldik. Biz bu mavsumda nafaqat Qo‘qon shahri balki Farg‘ona viloyati sharafini himoya qilamiz.
Bu narsa bizga yanada ko‘proq ma’suliyat yuklaydi. "Markaziy" stadionimizda ham PFL talablaridan kelib chiqib katta ko‘lamdagi ishlar amalga oshirildi. Maydon maysasi to‘liq yangilandi. Shuning uchun vaqtincha raqiblarimizni Farg‘onadagi "Istiqlol" stadionida qabul qilamiz. Mutaxassislar bilan maslaxatlashgan holda may oyining ikkinchi yarmida yoki iyun oyidan boshlab o‘z maydonimizda raqiblarni qabul qilamiz.
Kelayotgan mavsumda jamoamiz har yilgidan yuqori maqsadlarni ko‘zlab maydonga tushadi. Biz bu yil sovrinli o‘rinlar uchun kurashamiz” dedi Baxtiyorjon Tolipov.
Shundan keyin qo‘qonliklar safiga kelib qo‘shilgan yangi futbolchilar: Boyan Knejevich, Milosh Nikolich, Jamshid Hasanov, Jasur Hasanov, Timur Hakimov, Timur Usmonov, Javohir Esonqulov va Shaxboz Erkinovlar keng ommaga rasman tanishtirildi.
Kim qaysi raqamda to‘p suradi: Boyan Knejevich - 89, Milosh Nikolich - 55, Jamshid Hasanov - 7, Jasur Hasanov - 16, Timur Hakimov - 11, Timur Usmonov - 21, Javohir Esonqulov - 13 va Shaxboz Erkinov – 22.
O‘tkazilgan tadbirda muxlislarimizga ham mikrofon taqdim qilindi. Ular jamoa rahbariyati va futbolchilarga o‘zlarini qiziqtirgan savollar bilan murojaat qilishdi.
