Bugun O‘zbekiston Milliy Olimpiya qo‘mitasida bokschilarimizning Tokio Olimpiadasiga tayyorgarligi yuzasidan yig‘ilish bo‘lib o‘tdi.

Mazkur uchrashuvda MOQ Bosh kotibi Jasur Matchanov, O‘zbekiston boks federasiyasi rahbariyati hamda terma jamoa bosh murabbiyi Marat Qurbonov ishtirok etdi.

Yig‘ilishda sportchilarimizning Tokio-2020 Olimpiadasiga tayyorgarlik strategiyasi muhokama qilinib, bokschilarimizning xalqaro musobaqalardagi natijalari tahlil qilindi. Shuningdek, yaqinlashib kelayotgan Osiyo va jahon chempionatiga tayyorgarlik, tashkil qilinishi kerak bo‘lgan mahalliy va xorijiy o‘quv-yig‘in mashg‘ulotlari ham muhokama etildi.

Bundan tashqari Jasur Matchanov Respublika turnirlarida hakamlik masalasiga ham alohida to‘xtaldi. Unda faoliyat olib borgan referilar faoliyatini qattiq tanqid qildi. MOQ Bosh kotibi yosh bokschining kelajakda kamol topishida hakamlarga ham ko‘p narsa bog‘liq ekaniga to‘xtalib, murabbiy va sportchining mashaqqatli mehnatini hakam yo‘q qilib yuborishi mumkin, deya ta’kidladi. Suhbat so‘ngida Jasur Matchanov federasiya mutasaddilari oldiga qilinishi kerak bo‘lgan ishlar yuzasidan ko‘rsatma berib, ko‘tarilgan savollarga jiddiy yondashish keraklagini aytib o‘tdi.