Бугун Ўзбекистон Миллий Олимпия қўмитасида боксчиларимизнинг Токио Олимпиадасига тайёргарлиги юзасидан йиғилиш бўлиб ўтди.
Мазкур учрашувда МОҚ Бош котиби Жасур Матчанов, Ўзбекистон бокс федерацияси раҳбарияти ҳамда терма жамоа бош мураббийи Марат Қурбонов иштирок этди.
Йиғилишда спортчиларимизнинг Токио-2020 Олимпиадасига тайёргарлик стратегияси муҳокама қилиниб, боксчиларимизнинг халқаро мусобақалардаги натижалари таҳлил қилинди. Шунингдек, яқинлашиб келаётган Осиё ва жаҳон чемпионатига тайёргарлик, ташкил қилиниши керак бўлган маҳаллий ва хорижий ўқув-йиғин машғулотлари ҳам муҳокама этилди.
Бундан ташқари Жасур Матчанов Республика турнирларида ҳакамлик масаласига ҳам алоҳида тўхталди. Унда фаолият олиб борган реферилар фаолиятини қаттиқ танқид қилди. МОҚ Бош котиби ёш боксчининг келажакда камол топишида ҳакамларга ҳам кўп нарса боғлиқ эканига тўхталиб, мураббий ва спортчининг машаққатли меҳнатини ҳакам йўқ қилиб юбориши мумкин, дея таъкидлади. Суҳбат сўнгида Жасур Матчанов федерация мутасаддилари олдига қилиниши керак бўлган ишлар юзасидан кўрсатма бериб, кўтарилган саволларга жиддий ёндашиш кераклагини айтиб ўтди.
