Kecha, 28 mart kuni tennis bo‘yicha O‘zbekiston o‘smirlar terma jamoasi yana bir yirik musobaqada ishtirok etish uchun Malayziyaga jo‘nab ketdi. Kuala-Lumpur shahrida ushbu sport turi bo‘yicha bo‘lib o‘tadigan o‘smirlar o‘rtasidagi ITF jamoaviy chempionatida mamlakatimizdan 6 nafar yosh raketka ustasi qatnashishi kutilmoqda.

Mazkur chempionatda yurtimiz sharafini o‘g‘il bolalardan Amir Milushev, Boburmirzo Yoqubjonov, Qodirjon Odilov, qizlardan Maftunabonu Qahramonova, Shahnoza Marimova hamda Munisa Ashurbekovalar himoya qilishadi. O‘zbekiston tennis federasiyasi tomonidan musobaqa tashkiliy qo‘mitasiga yuborilgan buyurtmada zaxiradagi sportchi Ismoil Turdiyevning nomi ham qayd etilgan.

E’tiborli tomoni Malayziyaga jo‘nab ketgan tarkibimiz asosini 14 yoshli tennischilar tashkil etgan, birgina Shahnoza Marimova 13 yoshda. Shuningdek, 6 sportchimizning 5 nafari Tennis bo‘yicha Respublika ixtisoslashtirilgan olimpiya zaxiralari sport maktabi tarbiyalanuvchilari ekanligini ham ma’lumot o‘rnida keltirib o‘tish mumkin. Yagona tennischimiz, Qodirjon Odilov Farg‘ona viloyati sport o‘yinlari va yengil atletika bo‘yicha ixtisoslashtirilgan bolalar-o‘smirlar sport maktabida mashg‘ulot olib boradi.

Turnir davomida vakillarimizga Farrux Obidov va Muhammadrizo Saidxo‘jayev murabbiylik qilishadi.

Natijalar haqida xabar berib boramiz.