Ayni kunlarda Malayziyada chim ustida xokkey bo‘yicha Osiyodagi bir nechta federasiyalar mutasaddilari ishtirokida navbatdagi konferensiya bo‘lib o‘tmoqda.

Unda ushbu sport turini qit’amizda yanada rivojlantirish va ommaviyligini oshirish bo‘yicha qo‘shimcha chora-tadbirlar muhokamasi o‘tkazilyapti. Mazkur yig‘ilishda yurtimiz nomidan O‘zbekiston chim ustida xokkey federasiyasi raisi, Osiyo chim ustida xokkey federasiyasi Ijroiya qo‘mitasi a’zosi Bahodir Ahmedov boshchiligidagi kichik delegasiya ham qatnashmoqda.

Ma’lumki, joriy yilning iyun oyida Hindistonda Osiyo qit’asi uchun Tokio Olimpiadasiga lisenziya beruvchi musobaqa bo‘lib o‘tadi. Malayziyadagi yig‘ilishda ushbu turnirga ko‘rilayotgan tayyogarlik, terma jamoalar o‘rtasida tashkil qilinadigan yig‘inlar va o‘zaro tajriba almashish masalalari ham ko‘rib chiqilmoqda. Ushbu jarayonni qit’amiz vakillaridan tashqari Polsha va Kanada chim ustida xokkey federasiyasi mutasaddilari ham kuzatib borishyapti.

O‘zbekiston chim ustida xokkey federasiyasi ham Tokio Olimpiadasiga yo‘llanma olishni maqsad qilib qo‘ygan. Tajriba orttirish va xalqaro aloqalarni o‘rnatishga yordam beradigan mazkur konferensiyadagi ishtirok esa Olimpiada yo‘lida tashlangan qadamlardan biri bo‘lib qoladi.