Argentina terma jamoasi va “Barselona” klubi sardori Lionel Messi ijtimoiy tarmoqda unga nisbatan qilinayotgan tanqidlar, tahdidlar va yozilayotgan yolg‘onlarni to‘xtatishlarini so‘radi.
Argentinalik futbolchi Club Octubre 94.7 FM radiosiga bergan intervyusida o‘zi uchun o‘tgan hafta qiyin o‘tgani va unga o‘lim bilan tahdid qilishgani, hatto o‘g‘li ham ommaviy axborot vositalaridagi salbiy izohlardan xabardor ekanligini aytib o‘tgan, deb yozmoqda Goal nashri.
“Bu juda og‘ir, o‘g‘lim doim YouTubeda video tomosha qiladi, – dedi u. – Tiago mendan Argentinada nima uchun meni o‘ldirishni xohlashayotganini so‘radi. Lekin menga faoliyatimni terma jamoada davom ettirish yoqadi.
Milliy terma jamoa bilan birga g‘alaba qozonishni istayman. Barcha muhim o‘yinlarda o‘ynashga tayyorman. Biz allaqachon Jahon kubogi finalida o‘ynaganmiz va bu oson ish emas”, – deydi Messi.
U Argentina terma jamoasi murabbiylar shtabini o‘zgartirilishida qo‘li borligi haqidagi xabarlarni inkor etib: “Men haqimda aytgan barcha yolg‘onlarini haqiqatga aylantirmoqchi emasman. Hech qachon milliy terma jamoa murabbiylari haqida qaror qabul qilmaganman.
Ammo bunday yomon xabarlarni eshitmoqdaman. Bu men uchun juda qiyin jarayon. Agar Braziliyada bo‘lib o‘tgan jahon chempionatida g‘olib chiqqan bo‘lganimizda, hozir bunday voqealar guvohi bo‘lmagan bo‘lardik.
Biz juda kichik detallar evaziga mag‘lub bo‘ldik. Va buni matbuotda turlicha talqin qilishdi. Menimcha, matbuot boshqacharoq tarzda ish tutishi kerak edi”, – dedi futbolchi.
Messi, shuningdek, “Albiceleste” murabbiyi Lionel Skalonining terma jamoani Copa America turniri uchun qay darajada tayyorlayotgani va jamoa g‘alaba qozonish uchun murabbiy ko‘proq tajribaga muhtoj ekanligi haqida ham to‘xtalib o‘tdi. 
“Futbolchilar bilishi kerakki, oldimizda yettita yoki sakkizta o‘yin bor xolos va buni yaxshi tushungan holda sabr-toqatli bo‘lishimiz kerak”, – deydi argentinalik forvard. Eslatib o‘tamiz, Messi Argentina termasining Venesuelaga qarshi kechgan o‘yinida jarohat olgan edi. Hujumchi ushbu jarohatdan tezda sog‘ayib, mashg‘ulotlarda ishtirok etayotganligi hamda La Liga doirasida “Espanyol”ga qarshi Kataloniya derbisida maydonga tushishi haqida ma’lumot berildi.
