Xabaringiz bor, kecha Superliganing 2-turidan o‘rin olgan “Bunyodkor” hamda “Paxtakor” jamoalari o‘rtasidagi bahs bo‘lib o‘tdi. Unda “sherlar” 2:1 hisobida zafar quchdi.
O‘yindan keyin matbuot anjumani bo‘lib o‘tdi. Matbuot anjumanida qatnashgan saytimiz muxbiri Yahyoxo‘ja Ulug‘xo‘jayev “sherlar” ustozi Shota Arveladzega savol bilan murojaat qildi. Shota esa bu savolga jahl bilan javob qaytardi.
- Javohir Siddiqovni asosiy tarkibda o‘ynashga immkoniyati bormi?
- Albatta. Nima uchun unda qo‘ymayapman? Sidiqov jamoaga qachon kelganini bilasizmi? Javohir Osiyo kubogidan keyin jamoa bilan umuman shug‘ullanmagan. Zalda individual ravishda mashg‘ulot olib borgan. Bizga esa OCHL saralash bosqichi o‘yinlarini o‘tkazganimizdan so‘ng keldi. Futbolchi ham inson. Ularni o‘yinga, yangi mavsumga dastur asosida tayyorlab boriladi. Futbolchining mushaklari 90 daqiqa o‘ynashga chidamli bo‘lishi kerak.
Misol uchun men ham 10 yil avval futbol o‘ynaganman. Ammo hozir maydonga tushib yugurib ketolmayman.
Javohirni hech kim sindirmoqchi emas. Shuningdek MTJ bosh murabbbiyi Ektor Kuperga Sidiqovni terma jamoaga chaqirgani va unga o‘yin amaliyotini taqdim etgani uchun rahmat aytish kerak. Deyarli ikki oy yakka tartibda shug‘ullanib yurgan futbolchini tayyor holatga keltirganimizdan so‘ng unga ko‘proq imkoniyat taqdim etiladi. Chempionat endigina boshlandi. Hali Superliga karvoni uzoq. O‘rtada biroz to‘xtalish yuzaga keldi”, -deydi Shota Arveladze.
