Bugun Jismoniy tarbiya va sport vazirligiga Qozog‘iston madaniyat va sport ishlari vaziri Aristanbek Muxameduli va Qozog‘istonning O‘zbekistondagi favqulodda va muxtor elchisi Darxan Satibaldi tashrif buyurdi.
Yurtimizga Xalqaro baxshichilik san’ati festivalida ishtirok etish uchun kelgan Aristanbek Muxameduli boshchiligidagi delegasiyani Jismoniy tarbiya va sport vaziri Dilmurod Nabiyev qabul qildi.
Uchrashuvda tomonlar jismoniy tarbiya va sportni ommalashtirish, nufuzli musobaqalarga sportchilarni tayyorlash, yirik sport tadbirlarini o‘tkazish kabi yo‘nalishlardagi aloqalarini yanada rivojlantirish istiqbollari muhokama qilindi. Do‘stona ruhda, samimiy o‘tgan tadbirda vazirlar tomonlarning mazkur yo‘nalishlardagi yutuq va muammolar haqida suhbatlashib, o‘zaro tajriba almashdilar.
Xususan, Dilmurod Nabiyev Prezidentimiz tomonidan yurtimizda jismoniy tarbiya va sportni ommalashtirishga alohida e’tibor qaratilayotgani ta’kidlab, ayniqsa qishki sport turlari bo‘yicha Qozog‘istonning ilg‘or tajribalarini o‘rganish rejalashtirilayotganini ma’lum qildi.
O‘z navbatida Qozog‘iston madaniyat va sport ishlari vaziri Aristanbek Muxameduli ham ikki davlat o‘rtasida jismoniy tarbiya va sport sohasidagi hamkorlikni yanada kuchaytirish lozimligini, yaqinda qurib foydalanishga topshirilgan “Humo Arena” muz saroyi ham qishki sport turlari rivoji yo‘lida qo‘yilgan dadil qadam bo‘lganini ta’kidlab, bundan buyon hamkorlikda yirik musobaqalar o‘tkazish orqali sport turizmini yanada rivojlantirishni taklif etdi.
