Fevral oyida boshlangan xokkey bo‘yicha tarixiy O‘zbekiston birinchi chempionati ham o‘zining hal qiluvchi pallasiga kirdi.   Kecha poytaxtimizdagi “Ice City” ko‘ngilochar-sport majmuasi muz maydonida mamlakat chempionatining hal qiluvchi final o‘yini boshlandi. Unda chempionlikka da’vogarlar bo‘lmish “Binokor” hamda “Semurg‘” jamoalari o‘zaro ro‘baro‘ kelishdi.   Keskin va murosasiz kurashlarga boy tarzda o‘tgan uchrashuvda “Binokor” xokkeychilari irodali g‘alabaga erishdi. Boisi, final o‘yinini “Semurg‘” jamoasi ko‘tarinki ruhda boshlagan va Maksim Bostanjiyevning aniq zarbasidan keyin hisobda oldinga chiqib olishgandi.   Ammo, tajriba mana shunday pallalarda qo‘l kelishini “Binokor” jamoasi a’zolari yana bir karra isbotladi va ular ikkinchi davrdayoq hisobda oldinga chiqib olishdi. So‘nggi uchinchi davrda o‘yin asosan bir jamoa darvozasi oldida kechdi va “Binokor” xokkeychilari yana ikki marotaba muvaffaqiyat qozonishdi, yakuniy hisob – 5:2, “Binokor” foydasiga.   Shu o‘rinda ta’kidlash joiz, “Binokor” jamoasi munazam chempionatni bo‘sh boshlagan va ancha vaqtgacha jadvalning so‘nggi pog‘onasida borayotgandi. Biroq, hal qiluvchi pallaga kelganda jamoa o‘yini ochilib ketdi va ular avvaliga yarim finalda “Toshkent” jamoasini 3-0 hisobida ishonch bilan mag‘lub etgan bo‘lsa, endi finalni ham ko‘tarinki ruhda boshladi.   Eslatib o‘tamiz, O‘zbekiston birinchi chempionatining final uchrashuvi ham uch g‘alabaga qadar davom etadi. “Binokor” – “Semurg‘” jamoalari o‘rtasidagi ikkinchi uchrashuv 10 aprel kuni soat 20:00 da boshlanadi.             O‘zbekiston chempionati. Pley-off. Final   “Binokor” – “Semurg‘” – 5:2 (0:1, 3:1, 2:0)   Seriyadagi hisob – 1:0.