Февраль ойида бошланган хоккей бўйича тарихий Ўзбекистон биринчи чемпионати ҳам ўзининг ҳал қилувчи палласига кирди.   Кеча пойтахтимиздаги “Ice City” кўнгилочар-спорт мажмуаси муз майдонида мамлакат чемпионатининг ҳал қилувчи финал ўйини бошланди. Унда чемпионликка даъвогарлар бўлмиш “Бинокор” ҳамда “Семурғ” жамоалари ўзаро рўбарў келишди.   Кескин ва муросасиз курашларга бой тарзда ўтган учрашувда “Бинокор” хоккейчилари иродали ғалабага эришди. Боиси, финал ўйинини “Семурғ” жамоаси кўтаринки руҳда бошлаган ва Максим Бостанжиевнинг аниқ зарбасидан кейин ҳисобда олдинга чиқиб олишганди.   Аммо, тажриба мана шундай паллаларда қўл келишини “Бинокор” жамоаси аъзолари яна бир карра исботлади ва улар иккинчи даврдаёқ ҳисобда олдинга чиқиб олишди. Сўнгги учинчи даврда ўйин асосан бир жамоа дарвозаси олдида кечди ва “Бинокор” хоккейчилари яна икки маротаба муваффақият қозонишди, якуний ҳисоб – 5:2, “Бинокор” фойдасига.   Шу ўринда таъкидлаш жоиз, “Бинокор” жамоаси муназам чемпионатни бўш бошлаган ва анча вақтгача жадвалнинг сўнгги поғонасида бораётганди. Бироқ, ҳал қилувчи паллага келганда жамоа ўйини очилиб кетди ва улар аввалига ярим финалда “Тошкент” жамоасини 3-0 ҳисобида ишонч билан мағлуб этган бўлса, энди финални ҳам кўтаринки руҳда бошлади.   Эслатиб ўтамиз, Ўзбекистон биринчи чемпионатининг финал учрашуви ҳам уч ғалабага қадар давом этади. “Бинокор” – “Семурғ” жамоалари ўртасидаги иккинчи учрашув 10 апрель куни соат 20:00 да бошланади.             Ўзбекистон чемпионати. Плей-офф. Финал   “Бинокор” – “Семурғ” – 5:2 (0:1, 3:1, 2:0)   Сериядаги ҳисоб – 1:0.