«Barselona» bosh murabbiyi Ernesto Valverde Yevropa chempionlar ligasi chorak final bosqichi doirasida «Manchester Yunayted»ga qarshi bo‘ladigan o‘yin oldidan o‘z fikrlarini bildirib o‘tdi.

«MYU»ning kuchli tomoni – bu nafaqat standart vaziyatlar. Jamoa avvalgi bosqichda «PSJ» ustidan qozonilgan g‘alaba va so‘nggi oylardagi muvaffaqiyatlardan keyin ruhlanib ketdi. Biz keyingi bosqichga chiqishni istaymiz. Buning uchun raqibning kuchli tomoni bo‘lgan standartlarga alohida e’tibor qaratishimiz lozim.

Oldimizga qandaydir natija qayd etish vazifasini qo‘ymaymiz. Ammo safarda gol urishni istaymiz. Avvalgi bosqichlarda o‘z uyimizda ko‘p gol urdik.

Biz g‘alaba uchun maydonga chiqamiz. Bu borada ortiqcha gapning keragi yo‘q. Bu bahsda shunchaki faqat himoyalanish yoki faqat hujum qilish mumkin emas. Har ikkalasini mukammal bajarish lozim.

Dembele? Uning mashg‘ulotda qay tariqa ishlashiga qaraymiz. Bu «Lion»ga qarshi o‘yin oldidan yuzaga kelgan vaziyatga o‘xshaydi. Bu birinchi o‘yin va buni unutmaslik lozim. Haddan tashqari tavakkalchilikka qo‘l urmaymiz.

Barcha top-jamoalar g‘alaba qozonishni istashadi. Bu borada biz ham istisno emasmiz. «Liverpul» va «Manchester Siti» klublari ham musobaqada g‘olib chiqishni istashadi. Biz o‘zimizga ishonamiz. Mavsum davomida qiyin vaziyatlardan yaxshi chiqib ketdik», – dedi Valverde.

«Manchester Yunayted» – «Barselona» bahsi ertaga, 10 aprel kuni bo‘lib o‘tadi.