«Барселона» бош мураббийи Эрнесто Вальверде Европа чемпионлар лигаси чорак финал босқичи доирасида «Манчестер Юнайтед»га қарши бўладиган ўйин олдидан ўз фикрларини билдириб ўтди.

«МЮ»нинг кучли томони – бу нафақат стандарт вазиятлар. Жамоа аввалги босқичда «ПСЖ» устидан қозонилган ғалаба ва сўнгги ойлардаги муваффақиятлардан кейин руҳланиб кетди. Биз кейинги босқичга чиқишни истаймиз. Бунинг учун рақибнинг кучли томони бўлган стандартларга алоҳида эътибор қаратишимиз лозим.

Олдимизга қандайдир натижа қайд этиш вазифасини қўймаймиз. Аммо сафарда гол уришни истаймиз. Аввалги босқичларда ўз уйимизда кўп гол урдик.

Биз ғалаба учун майдонга чиқамиз. Бу борада ортиқча гапнинг кераги йўқ. Бу баҳсда шунчаки фақат ҳимояланиш ёки фақат ҳужум қилиш мумкин эмас. Ҳар иккаласини мукаммал бажариш лозим.

Дембеле? Унинг машғулотда қай тариқа ишлашига қараймиз. Бу «Лион»га қарши ўйин олдидан юзага келган вазиятга ўхшайди. Бу биринчи ўйин ва буни унутмаслик лозим. Ҳаддан ташқари таваккалчиликка қўл урмаймиз.

Барча топ-жамоалар ғалаба қозонишни исташади. Бу борада биз ҳам истисно эмасмиз. «Ливерпуль» ва «Манчестер Сити» клублари ҳам мусобақада ғолиб чиқишни исташади. Биз ўзимизга ишонамиз. Мавсум давомида қийин вазиятлардан яхши чиқиб кетдик», – деди Вальверде.

«Манчестер Юнайтед» – «Барселона» баҳси эртага, 10 апрель куни бўлиб ўтади.