O‘zbekistonlik bokschi Bahodir Jalolov bugun professional boksdagi oltinchi jangini o‘tkazgani haqida avvalroq xabar bergan edik.

Jang yakunlangandan so‘ng o‘zbekistonlik bokschining raqibi Brendan Barret ijtimoiy tarmoqdagi sahifasida Bahodir Jalolovning kuchli zarbasidan so‘ng burni singanini yozib qoldirdi.

“Afsuski, bu kecha uddalay olmadim. Raqibning bo‘yi baland bo‘lgani va chap qo‘l uslubi imkoniyatidan foydalangani menga katta qiyinchilik tug‘dirdi.

Bunday ulkan raqib bilan har qancha mashg‘ulot o‘tkazsang hamuni yiqitish qiyin bo‘ladi. Burnim birinchi chap qo‘l zarbasidan sindi, vaziyat yomonlasha boshlagach, referi jangni to‘xtatdi. 

Afsusdaman, ammo burnimdagi jarohatni tiklab olgach,mashg‘ulotlarga qaytaman. Qo‘llab-quvvatlaganingiz uchun yana bir bor rahmat”, deya yozgan Brendan Barret.

Ma’lumot o‘rnida, amerikalik Brendan Barretga qarshi ringga ko‘tarilgan Bahodir jang to‘liq yakuniga yetmasdan, birinchi raundning o‘zida raqibini nokautga uchratdi.

Shu tariqa o‘zbekistonlik bokschi o‘zining oltinchi jangini ham muddatidan avval yakunlab, “NABF Junior Heavyweight Title” titul kamarini qo‘lga kiritish bilan birga super og‘ir vazn toifasining reytingida yanada yuqori pog‘onaga ko‘tariladigan bo‘ldi.

Endi Jalolov 16-27 aprel kunlari Tailandda bo‘lib o‘tadigan Osiyo chempionatida ishtirok etish uchun terma jamoa ixtiyoriga qo‘shiladi.