O‘zbekiston futbol assosiasiyasi tomonidan istiqbolli va iqtidorli futbolchilarni turli yosh toifadagi milliy terma jamoalar hamda professional futbol klublari uchun tayyorlab borish maqsadida bir qator chora-tadbirlar amalga oshirilmoqda.

Jumladan, mamlakatimiz tarixida ilk bor O‘zbekiston futbol assosiasiyasi huzuridagi Qoraqalpog‘iston Respublikasi, viloyatlar va Toshkent shahar bolalar-o‘smirlar futbol akademiyalarining U-14, U-15,
U-16, U-17 yoshdagi tarbiyalanuvchilari o‘rtasida O‘zbekiston Chempionati o‘tkazilishi haqida xabar berib o‘tgandik. Bugun ana shu musobaqaning 2-tur o‘yinlariga start beriladi.

"A" guruhidagi 2-tur uchrashuvlarida Samarqand viloyati Buxoroga qarshi, Qoraqalpog‘iston Respublikasi akademiyasi Surxondaryoga qarshi, Navoiy akademiyasi esa Qashqadaryo bolalar va o‘smirlar akademiyasi tarbiyalanuvchilariga qarshi maydonga tushadi. "A" guruhida 2-turda Xorazm viloyat akademiyasi dam oladi.

"B" guruhida 2-turda Toshkent shahri akademiyasi Andijon viloyati akademiyasiga qarshi, Jizzax viloyati Namangan viloyat akademiyasiga qarshi, Toshkent viloyati Farg‘ona viloyati akademiyasiga qarshi bahs olib boradi. Bu guruhda 2-turda Sirdaryo viloyati akademiyasi dam oladi.