Osiyo qit’asida JCH-2022 va Osiyo kubogi-2023 qo‘shma saralashining dastlabki bosqichiga qur’a tashlash marosimi bo‘lib o‘tadi. Tadbir 17 aprel kuni Malayziya poytaxti Kuala Lumpur shahrida Toshkent vaqti bilan 07:00da boshlanadi.

1-saralash bosqichi
FIFA reytingida eng quyi o‘rinlarni egallab turgan 12ta terma jamoa qur’a orqali 6ta juftlik hosil qilishadi.
1-savatcha: Malayziya, Kamboja, Makao, Laos, Butan, Mo‘g‘uliston
2-savatcha: Bangladesh, Guam, Bruney-Dorussalom, Sharqiy Timor, Pokistan, Shri-Lanka.

Uy-safar tizimida o‘tadigan ikkita o‘yindan iborat bosqichda g‘olib chiqqan 6ta jamoa keyingi bosqichga yo‘l olishadi. Bu bosqich bahslari shu yilning 6 va 11 iyun kunlari o‘tkaziladi.

2-saralash bosqichi:
Birinchi bosqichdan o‘tgan 6ta jamoa Osiyoning qolgan 34ta termasi safiga qo‘shiladi. 40ta terma jamoa 5tadan 8ta guruhga bo‘linadi. Guruh g‘oliblari (8) va 2-o‘rinlar orasida eng yaxshi ko‘rsatkichga ega bo‘lgan 4ta terma keyingi bosqichga chiqadi. Mazkur 12ta terma jamoa Osiyo kubogi-2023 yo‘llanmasini ham qo‘lga kiritadi. Bu bosqich o‘yinlari 2019 yilning 5 sentyabridan 2020 yilning 9 iyuniga qadar o‘tkaziladi.

3-saralash bosqichi
12ta terma jamoa 6tadan 2ta guruhga bo‘linadi. Uchinchi bosqich o‘yinlari 2020 yilning 3 sentyabridan 2021 yilning 12 oktyabriga qadar o‘tkaziladi. FIFA JCH-2022da nechta jamoa ishtirok etishiga oydinlik kiritganidan keyin Osiyoga qancha kvota ajratilishi aniq bo‘ladi. Mundial yo‘llanmalari egalari nomi ushbu bosqichda aniq bo‘ladi.