Осиё қитъасида ЖЧ-2022 ва Осиё кубоги-2023 қўшма саралашининг дастлабки босқичига қуръа ташлаш маросими бўлиб ўтади. Тадбир 17 апрель куни Малайзия пойтахти Куала Лумпур шаҳрида Тошкент вақти билан 07:00да бошланади.

1-саралаш босқичи
ФИФА рейтингида энг қуйи ўринларни эгаллаб турган 12та терма жамоа қуръа орқали 6та жуфтлик ҳосил қилишади.
1-саватча: Малайзия, Камбожа, Макао, Лаос, Бутан, Мўғулистон
2-саватча: Бангладеш, Гуам, Бруней-Доруссалом, Шарқий Тимор, Покистан, Шри-Ланка.

Уй-сафар тизимида ўтадиган иккита ўйиндан иборат босқичда ғолиб чиққан 6та жамоа кейинги босқичга йўл олишади. Бу босқич баҳслари шу йилнинг 6 ва 11 июнь кунлари ўтказилади.

2-саралаш босқичи:
Биринчи босқичдан ўтган 6та жамоа Осиёнинг қолган 34та термаси сафига қўшилади. 40та терма жамоа 5тадан 8та гуруҳга бўлинади. Гуруҳ ғолиблари (8) ва 2-ўринлар орасида энг яхши кўрсаткичга эга бўлган 4та терма кейинги босқичга чиқади. Мазкур 12та терма жамоа Осиё кубоги-2023 йўлланмасини ҳам қўлга киритади. Бу босқич ўйинлари 2019 йилнинг 5 сентябридан 2020 йилнинг 9 июнига қадар ўтказилади.

3-саралаш босқичи
12та терма жамоа 6тадан 2та гуруҳга бўлинади. Учинчи босқич ўйинлари 2020 йилнинг 3 сентябридан 2021 йилнинг 12 октябрига қадар ўтказилади. ФИФА ЖЧ-2022да нечта жамоа иштирок этишига ойдинлик киритганидан кейин Осиёга қанча квота ажратилиши аниқ бўлади. Мундиал йўлланмалари эгалари номи ушбу босқичда аниқ бўлади.