Superliganing 5-turida "Paxtakor" Samarqandning "Dinamo" jamoasini qabul qiladi.
Davron Fayziyev boshchilik qilayotgan "Dinamo" dastlabki turlarda yaxshi taassurot qoldirdi. O‘tgan 4 turda 7 ochko to‘plagan samarqandliklar ushbu tur arafasida 5-pog‘onadan o‘rin olishgan. Shu sababli 18 aprel kuni o‘tadigan uchrashuvning qiziqarli kechishini kutish mumkin. Chunki ijobiy natijalardan so‘ng "Dinamo" peshqadamga munosib qarshilik ko‘rsatishga urinishi tabiiy.
Jamoalar chempionatlar doirasida o‘zaro 46 marta maydonga tushishgan. Shundan 35 o‘yinda "Paxtakor" muvaffaqiyatga erishgan. 5 bahsda durang qayd etilgan bo‘lsa, 6 bor "Dinamo" g‘alaba qozongan. Raqib darvozasini 92 marta ishg‘ol etgan "Sherlar" o‘z darvozasidan 23 to‘p o‘tkazib yuborishgan. Toshkentda o‘tkazilgan 23 uchrashuvning 21tasida "Paxtakor" zafar quchgan. Ikki bor esa Samarqand jamoasi ustun kelgan. O‘zaro o‘yinlarda eng yirik g‘alabamiz 6:0 natijasidan iborat bo‘lgan.
Jamoalar safida diskvalifikasiya tufayli o‘yinni o‘tkazib yuboradigan futbolchilar yo‘q.
"Paxtakor" va "Dinamo" o‘rtasidagi bellashuv 18 aprel, payshanba kuni soat 18:15da "Paxtakor" stadionida boshlanadi.
