Osiyo chempionlar ligasi 4-tur doirasidagi “As Sadd”– “Paxtakor” uchrashuvi oldidan tashkil etilgan matbuot anjumanining ikkinchi qismida “sherlar” bosh murabbiyi Shota Arveladze va jamoa sardori Yegor Krimes qatnashishdi.

Arveladze: - Ertaga bizni qiyin va qiziqarli o‘yin kutmoqda. Turnir jadvali va ochkolardan kelib chiqsak, o‘ta ahamiyatli to‘qnashuv. Har ikki jamoa futbol o‘ynashga intiladi. Muxlislar chiroyli va hujumkor futbol ko‘rishadi deb o‘ylayman.

Guruhimizda kuchli jamoalar jamlangan. Kimningdir g‘alabasi men uchun syurpriz bo‘lmaydi. Barcha jamoalarda imkoniyat bor. Bizda ba’zi o‘zgarishlar bo‘lishi mumkin, buni ertaga ko‘rasiz.

Doxada qandaydir boshqacha o‘yin bo‘ladi deb o‘ylamayman. Har ikki jamoa to‘pni nazorat qilishga, hujum uyushtirishga intiladi. Safimizda o‘zini ko‘rsata oladigan futbolchilar bor, ularning o‘yinini yoqtirib qolishingiz mumkin.

Raqibni Toshkentdagi o‘yindan keyin yanada o‘rgandik. Ba’zi kamchiliklarini bildik, o‘zimiz uchun xulosalar chiqardik. Ertaga bundan foydalanishga urinamiz.

Krimes: - Ertaga bizni yaxshi o‘yin kutib turibdi deb o‘ylayman. Bu yerga o‘z futbolimizni ko‘rsatish va g‘alaba qozonish maqsadida keldik.

Ertaga bizni durang qoniqtiradimi? Ikki o‘yinda durang o‘ynash guruhdagi vaziyatga ta’sir qilishi mumkin. Biz zafar quchishga intilamiz.