Xabaringiz bor, ayni kunlarda Azamat Abduraimov boshchiligidagi O‘zbekiston U-16 terma jamoasi o‘quv-mashg‘ulot yig‘inlari orqali Osiyo chempionati saralash bahslariga tayyorgarlik ko‘rmoqda. O‘zbekiston futbol assosiasiyasi tomonidan terma jamoamiz bo‘lajak muhim musobaqaga yetarlicha tayyorgarlik ko‘rishi uchun barcha zarur shart-sharoitlarni yaratib berilmoqda.

Jumladan, O‘zbekiston futbol assosiasiyasi O‘zbekiston U-16 terma jamoasiga saralash o‘yinlarida qo‘shimcha qulaylik yaratish maqsadida, Osiyo chempionati saralash o‘yinlariga mezbonlik qilish bo‘yicha Osiyo futbol konfederasiyasiga so‘rovnoma yuborgandi. OFK mazkur so‘rovnomaga ijobiy javob qaytarib, U-16 Osiyo chempionati saralashidan o‘rin olgan tegishli guruhdagi o‘yinlar Toshkentda bo‘lib o‘tishini tasdiqladi. Saralash bahslari shu yilning oktyabr yoki noyabr oylarida o‘tkaziladi. Mazkur saralash o‘yinlariga qur’a tashlash marosimi sanasi OFK tomonidan alohida e’lon qilinadi.

Umumiy hisobda U-16 Osiyo chempionati saralash bahslari quyidagi mamlakatlarda o‘tkaziladi:   G‘arbiy hudud: Iordaniya, Saudiya Arabistoni, Eron, O‘zbekiston, Qirg‘iziston, Qatar.   Sharqiy hudud: Indoneziya, Laos, Myanma, Singapur, Vyetnam.