“Buxoro” – “Bunyodkor” uchrashuvidan so‘ng mezbonlar ustozi Baxtiyor Ashurmatov quyidagicha fikr bildirib o‘tdi:

"Birinchi bo‘limdagi o‘yinimizdan umuman ko‘nglim to‘lmadi, muxlislar ham norozi bo‘lishdi. Yigitlar o‘yinga kirishib ketisha olishmadi, "Bunyodkor" jamoasi to‘pni yaxshi nazorat qilib, tezkor futbol ko‘rsatdi. Ularning o‘yiniga moslashish ancha qiyin kechdi. Buning oqibatida taym oxirlarida gol o‘tkazib yubordik.

Tanaffusdan keyin o‘yinimiz ancha jonlanib, hatto hisobda oldinga ham chiqib olgandik. Ikkinchi bo‘limdagi o‘yinimiz muxlislarga yoqdi, deb o‘ylayman. Lekin yana o‘sha himoyadagi oddiy xato sababli raqib jamoa hisobni tenglashtirdi. Afsuski, o‘z uyimizda qimmatli bo‘lgan 2 ochkoni yo‘qotdik. O‘z maydonimizdagi uchta o‘yinda atigi 2 ochkoni kiritish — biz uchun yomon natija. Keyingi o‘yinimiz yana bir tezkor jamoa "Nasaf" bilan bo‘lib o‘tadi, muxlislar daldasi bizga suv va havodek zarur", — dedi mutaxassis.