"PSJ" rahbariyati UYEFA tartib-intizom qo‘mitasining Neymarni diskvalifikasiya qilish qarorini bekor qildirishga harakat qilib ko‘radi.

Eslatib o‘tamiz, "PSJ" klubi Yevropa chempionlar ligasining nimchorak final bosqichidan chiqib ketganidan keyin parijliklar hujumchisi Neymar o‘zining Instagramdagi sahifasi orqali hakam Damir Skominani haqorat qilgandi.

Sloveniyalik hakam o‘yin so‘ngida to‘p Kimpembening qo‘liga tekkani bois "PSJ" darvozasiga penalti belgilagandi. Reshford esa 11 metrli jarima zarbasini aniq amalga oshirdi va "PSJ" musobaqani tark etdi.

"Bu sharmandalik! Videotakrorni kuzatish uchun futbolni tushunmaydigan 4 odamni qo‘yishgan. Hech narsa bo‘lmagan edi. Futbolchi bunday paytda qanday qilib qo‘lini olib qochishi mumkin edi?", — deya yozgan edi Neymar.

UYEFA esa bu ishni ko‘rib chiqib, braziliyalik futbolchini yevrokuboklarning 3ta o‘yiniga diskvalifikasiya qilish haqida qaror chiqardi.