O‘zbekiston yoshlar terma jamoasi Osiyo chempionati saralashiga tayyorgarlik olib borayotgani haqida xabar berib o‘tgandik. Terma jamoamizning raqiblari 9 may kuni bo‘lib o‘tadigan qur’a tashlash marosimida aniq bo‘ladi.
 
O‘zbekiston yoshlar terma jamoasi muhim musobaqaga yetarlicha tayyorgarlik ko‘rishi uchun O‘zbekiston futbol assosiasiyasi tomonidan barcha chora-tadbirlar amalga oshirilmoqda. Jumladan, shu yilning 20 may kuni Germaniyaning Berlin U-18 jamoasi O‘zbekistonga tashrif buyuradi. Otabek G‘ulomxo‘jayev boshchiligidagi O‘zbekiston yoshlar terma jamoasi vodiyda Berlin U-18 jamoasi bilan ikkita o‘rtoqlik o‘yini o‘tkazadi.
 
21 may kuni bo‘lib o‘tadigan uchrashuv Andijonda, 23 may kunidagi o‘yin esa Namanganda o‘tkaziladi. Mazkur o‘yinlar orqali Otabek G‘ulomxo‘jayev terma jamoaga nomzod futbolchilarni sinovdan o‘tkazib, turli o‘yin uslublarini amalda qo‘llab ko‘rishi rejalashtirilgan. Shu bilan birga bu uchrashuvlar vodiydagi futbol muxlislari uchun ajoyib futbol bayrami sifatida o‘tishi ham aniq.