Toshkentning “Paxtakor” klubi yarim himoyachisi Jalollidin Masharipov “Persepolis” bilan o‘yindan keyin bahs haqida fikrlarini bildirdi.

“Biz doim Chempionlar Ligasidagi o‘yinlarga boshqacha ishtiyoq bilan tushamiz. O‘yinga bo‘lgan munosabat ham ancha o‘zgaradi. Futbolchilarga bu turnirda o‘ynash chempionatda ishtirok etishdan ko‘ra osonroq bo‘lib qolgan.

Chunki bu musobaqada biz to‘liq e’tibor va jiddiy yondoshuv bilan maydonga tushamiz. Birinchi bo‘lim hujumlarimiz yaxshi o‘xshamadi. Bunga ob-havo va kam kelgan muxlislar sababchi bo‘ldi. Qachonki bizni qo‘llab-quvvatlash uchun minglab ishqibozlar kelsa, shunda jamoamiz o‘yini ham ancha yengillashadi. Muxlislar bizni maydonda ilhomlantirib turadi. Ularning ko‘magi bizga ruhan qo‘shimcha kuch va ishtiyoq beradi.

“Paxtakor” istalgan payt o‘zini ko‘rsata oladigan jamoa. Buni jamoamizni avvaldan biladigan zukko muxlislar bilishadi. Saudiya Arabistonidagi o‘yin biz uchun finalga teng bo‘ladi. Jamoa oldiga guruhdan chiqish vazifasi qo‘yilgan va biz kerakli ochkoni qo‘lga kiritish uchun safarga boramiz. To‘g‘ri, Saudiyada ob-havo issiq bo‘ladi. Shunga moslab tayyorgarlik ko‘rish kerak bo‘ladi. To‘pni asosan o‘zimizda saqlagan holda issiqni ham yengishga harakat qilamiz”, deydi Masharipov.