O‘zbekiston futbol assosiasiyasi tomonidan hududiy bolalar-o‘smirlar futbol akademiyalari tarbiyalanuvchilari orasida futbol hakamligi bilan shug‘ullanish istagida bo‘lgan yoshlarni har tomonlama qo‘llab-quvvatlash, xalqaro musobaqalarda faoliyat olib boradigan iqtidorli hakamlarni hozirdan tayyorlab borish maqsadida bir qator chora-tadbirlar amalga oshirilmoqda.   Aynan shu maqsadda Namangandagi "Markaziy" stadion anjumanlar zalida viloyat akademiyasi tarbiyalanuvchilari bilan shu mavzuda seminar tashkil qilindi. Seminarda Namangan viloyat futbol assosiasiyasi birinchi vise-prezidenti Bahrom Xolmirzayev, Namangan viloyat bolalar-o‘smirlar futbol akademiyasi direktori G‘anisher Ismoilov, nazoratchi hakamlar Igor Nexochin, Shuhrat Bozorov, hakamlar Rasul Fozilov, Maksim Nexochin va Ibrohim Ismoilovlar ishtirok etishdi.    Nazoratchi va hakamlar akademiya tarbiyalanuvchilariga hakamlik kasbining o‘ziga xos tomonlari haqida gapirib berishdi. Shuningdek, hakamlik bilan shug‘ullanishni istagan tarbiyalanuvchilar qaysi jihatlarga e’tibor qaratishlari zarurligi ta’kidlandi. Bundan tashqari, hakamlik uchun nomzodlarni tanlab olishda e’tibor qaratiladigan me’zonlar haqida tushuntirish berildi.     Uchrashuv davomida akademiya tarbiyalanuvchilari o‘zlarini qiziqtirgan savollar bilan  murojaat qilishdi va tegishli javoblar olishdi.