Ўзбекистон футбол ассоциацияси томонидан ҳудудий болалар-ўсмирлар футбол академиялари тарбияланувчилари орасида футбол ҳакамлиги билан шуғулланиш истагида бўлган ёшларни ҳар томонлама қўллаб-қувватлаш, халқаро мусобақаларда фаолият олиб борадиган иқтидорли ҳакамларни ҳозирдан тайёрлаб бориш мақсадида бир қатор чора-тадбирлар амалга оширилмоқда.   Айнан шу мақсадда Намангандаги "Марказий" стадион анжуманлар залида вилоят академияси тарбияланувчилари билан шу мавзуда семинар ташкил қилинди. Семинарда Наманган вилоят футбол ассоциацияси биринчи вице-президенти Баҳром Холмирзаев, Наманган вилоят болалар-ўсмирлар футбол академияси директори Ғанишер Исмоилов, назоратчи ҳакамлар Игорь Нехочин, Шуҳрат Бозоров, ҳакамлар Расул Фозилов, Максим Нехочин ва Иброҳим Исмоиловлар иштирок этишди.    Назоратчи ва ҳакамлар академия тарбияланувчиларига ҳакамлик касбининг ўзига хос томонлари ҳақида гапириб беришди. Шунингдек, ҳакамлик билан шуғулланишни истаган тарбияланувчилар қайси жиҳатларга эътибор қаратишлари зарурлиги таъкидланди. Бундан ташқари, ҳакамлик учун номзодларни танлаб олишда эътибор қаратиладиган меъзонлар ҳақида тушунтириш берилди.     Учрашув давомида академия тарбияланувчилари ўзларини қизиқтирган саволлар билан  мурожаат қилишди ва тегишли жавоблар олишди.