Mo‘g‘iliston poytaxtida gandbol bo‘yicha Xalqaro gandbol federasiyasining taqvim rejasidan o‘rin olgan “Trophy” musobaqasining Markaziy Osiyo bosqichi o‘z yakuniga yetdi.

Quvonarlisi, qizlar o‘rtasida o‘smirlar va yoshlar toifalarida kechgan musobaqada terma jamoamiz vakillari mintaqamizda tengsiz ekanliklarini yana bir bor isbotlashdi.

Bugun musobaqaning so‘nggi turida yoshlarimiz tojikistonlik tengqurlariga qarshi maydonga chiqib, yirik 54:3 hisobida ustun keldilar. Bu g‘alaba bilan guruhdagi yetakchilik yanada mustahkamlandi. Biroz avval musobaqaning tantanali yopilish marosimi bo‘lib o‘tdi va unda har ikki terma jamoamiz vakillariga oltin medallar hamda kubok topshirildi. Ta’kidlash joiz, har ikki toifadagi jamoamiz muddatidan avval oltin medallarni naqd qilib ko‘yishgan edi.

Reglamentga muvofiq, g‘olib terma jamoa bilan ikkinchi o‘rinni egallagan jamoalar “Trophy” kubogining Osiyo mintaqasiga yo‘llanmani qo‘lga kiritdi. Bu borada Turkmaniston terma jamoasi qizlari ham har ikki yo‘nalishda kumush medallarga sazovor bo‘lishdi.