Bilasiz, O‘zbekiston Professional futbol ligasi sog‘lom hayot tarzi uchun kurashayotgan bolalarni qo‘llab-quvvatlash maqsadida “Saratondan soyabon bo‘l” nomli xayriya aksiyasini boshlagandi.
Bu savobli aksiyada “Navbahor” futbol klubi ham qatnashmoqda. Aynan shu maqsadda Respublika ixtisoslashgan onkologiya va radiologiya ilmiy amaliy tibbiyot Markazining Namangan viloyat filialida ro‘yxatda turgan va moddiy yordamga muxtoj bo‘lgan bolalar orasida davolanayotgan 2011 yilning 17 oktyabrda tug‘ilgan, Uchqo‘rg‘on tumani, Qo‘g‘ay QFYda yashovchi Olimjonov Saidkamol Rustam o‘g‘li xonadoniga klub vakillari borib, bemorning holidan xabar olishdi. Olimjonovga klub tomonidan esdalik sovg‘alari topshirildi.
Saidkamolga yordam berishni istaganlar maxsus ochilgan plastik kartaga pul o‘tkazishlari yoki Coca Cola Superliganing 10-turida “Markaziy” stadionga o‘rnatiladigan xayriya qutiga pul mablag‘larini tashlashlari mumkin bo‘ladi.
