Биласиз, Ўзбекистон Профессионал футбол лигаси соғлом ҳаёт тарзи учун курашаётган болаларни қўллаб-қувватлаш мақсадида “Саратондан соябон бўл” номли хайрия акциясини бошлаганди.
Бу савобли акцияда “Навбаҳор” футбол клуби ҳам қатнашмоқда. Айнан шу мақсадда Республика ихтисослашган онкология ва радиология илмий амалий тиббиёт Марказининг Наманган вилоят филиалида рўйхатда турган ва моддий ёрдамга мухтож бўлган болалар орасида даволанаётган 2011 йилнинг 17 октябрда туғилган, Учқўрғон тумани, Қўғай ҚФЙда яшовчи Олимжонов Саидкамол Рустам ўғли хонадонига клуб вакиллари бориб, беморнинг ҳолидан хабар олишди. Олимжоновга клуб томонидан эсдалик совғалари топширилди.
Саидкамолга ёрдам беришни истаганлар махсус очилган пластик картага пул ўтказишлари ёки Coca Cola Суперлиганинг 10-турида “Марказий” стадионга ўрнатиладиган хайрия қутига пул маблағларини ташлашлари мумкин бўлади.
