Poytaxtimizdagi Mudofaa vazirligi sport majmuasida O‘zbekiston Respublikasi Qurolli Kuchlari harbiy xizmatchilari o‘rtasida milliy sport turi – kurash bo‘yicha chempionat o‘tkazildi.   Mudofaa vazirligi sport klubi tomonidan o‘tkazilgan mazkur musobaqada ishtirok etgan harbiy polvonlar yetti vazn toifasida g‘oliblik uchun o‘zaro kuch sinashdi.     Chempionatning yakkalik bahslarida vazni 60 kilogrammgacha bo‘lgan polvonlar o‘rtasida barcha raqiblarini yenggan Mudofaa vazirligi jamoasi a’zosi Rahmon Jumayev musobaqa g‘olibi, deya e’tirof etilgan bo‘lsa, 66 kilogrammgacha vaznda Ichki ishlar vazirligi jamoasi a’zosi Aziz Rajabov oltin medalni qo‘lga kiritdi.   Shuningdek, Nuriddin Tillavoldiyev (IIV), Sanjar To‘xtashev (IIV), Davlat Bobonov (MV), Shoberdi Rustamov (MG) Dilshod Samadov (IIV) o‘z vazn toifalarida muvaffaqiyatli ishtirok etib, shohsupaning eng yuqori pog‘onasidan joy oldi.   Keskin va murosasiz o‘tgan jamoaviy bahslarda Mudofaa vazirligi terma jamoasi 1-o‘rinni egalladi. Ushbu yo‘nalishda Ichki ishlar vazirligi jamoasi ikkinchi, Milliy gvardiya terma jamoasi uchinchi pog‘onadan joy oldi.