Пойтахтимиздаги Мудофаа вазирлиги спорт мажмуасида Ўзбекистон Республикаси Қуролли Кучлари ҳарбий хизматчилари ўртасида миллий спорт тури – кураш бўйича чемпионат ўтказилди.   Мудофаа вазирлиги спорт клуби томонидан ўтказилган мазкур мусобақада иштирок этган ҳарбий полвонлар етти вазн тоифасида ғолиблик учун ўзаро куч синашди.     Чемпионатнинг яккалик баҳсларида вазни 60 килограммгача бўлган полвонлар ўртасида барча рақибларини енгган Мудофаа вазирлиги жамоаси аъзоси Раҳмон Жумаев мусобақа ғолиби, дея эътироф этилган бўлса, 66 килограммгача вазнда Ички ишлар вазирлиги жамоаси аъзоси Азиз Ражабов олтин медални қўлга киритди.   Шунингдек, Нуриддин Тиллаволдиев (ИИВ), Санжар Тўхташев (ИИВ), Давлат Бобонов (МВ), Шоберди Рустамов (МГ) Дилшод Самадов (ИИВ) ўз вазн тоифаларида муваффақиятли иштирок этиб, шоҳсупанинг энг юқори поғонасидан жой олди.   Кескин ва муросасиз ўтган жамоавий баҳсларда Мудофаа вазирлиги терма жамоаси 1-ўринни эгаллади. Ушбу йўналишда Ички ишлар вазирлиги жамоаси иккинчи, Миллий гвардия терма жамоаси учинчи поғонадан жой олди.