«Real» sardori Serxio Ramos klubni tark etib, boshqa jamoa taklifini qabul qilish haqida bosh qotirmoqda. Bu haqda El Chiringuito jurnalisti Xuanfe Sans xabar tarqatdi.

Yakunlangan mavsum davomida klubda ro‘y bergan ba’zi ishlar Ramosga yoqmadi. Jumladan, madridliklar "Ayaks"ga yutqazib qo‘yib, Yevropa chempionlar ligasini tark etganidan keyin 33 yoshli futbolchi kiyinish xonasida klub prezidenti Florentino Peres bilan urishib qolgan.

«Manchester Yunayted» va «PSJ» klublari bir necha yillardan beri futbolchiga qiziqish bildirib keladi. Har safar ular rad javobini olgan bo‘lsa, bu safar vaziyat o‘zgarishi mumkin.

Ramos hozircha o‘zining maqsadini «Real» rahbariyatiga ma’lum qilmadi. Uning jamoa bilan amaldagi shartnomasi 2021 yilning iyun oyiga qadar tuzilgan.

Yakunlangan mavsumda futbolchi barcha musobaqalar doirasida 42ta o‘yinda maydonga tushib, 11ta gol urdi va 2ta golga uzatma berdi.