Ispaniya kubogining ushbu mavsumdagi g‘olibi nomi aniq bo‘ldi. "Valensiya" klubi finalda "Barselona"ni mag‘lub etib, mavsumni sovrin bilan yakunlaydigan bo‘ldi.
Butun o‘yin davomida ustunlik kataloniyaliklar tomonida bo‘lgan bo‘lsa-da, birinchi bo‘limda valensiyaliklar ikkita xavfli hujum tashkil qilib, raqib darvozasini ikki marta ishg‘ol qildi.
Ikkinchi bo‘limda Valverde shogirdlarining hujumlari bir marta samara keltirdi. Burchakdan yetkazilgan uzatmaga Langle bosh bilan zarba berdi. Davrozabon qaytargan to‘pni Messi darvozaga joylab qo‘ydi.
Qolgan daqiqalarda "Valensiya" nafaqat yaxshi himoyalandi, balki qarshi hujumlarda bir qator imkoniyatlarni yuzaga keltirdi. Ammo qulay vaziyatlardan ular foydalana olishmadi. Shunga qaramay, valensiyaliklar o‘yinni g‘alaba bilan yakunlashdi.
Shu paytgacha 30 marta Ispaniya kubogiga ega chiqqan "Barselona" so‘nggi 5 yildan beri ushbu sovrinni hech kimga bermay kelayotgan edi. "Valensiya" esa o‘z tarixida 8-marta Kubokni qo‘lga kiritdi.
Ispaniya kubogi. final
Barselona – Valensiya 1:2 (0:2, 1:0)
Gollar: 0:1 – 21 Gameyro, 0:2 – 33 Rodrigo, 1:2 – 73 Messi.
Barselona – Sillessen, Langle, Pike, Alba, Serdji Roberto, Koutinyo, Buskets, Artur (Vidal, 46), Rakitich (Alenya, 76), Nelson Semedu (Malkom, 46), Messi.
Valensiya – Domenek, Gabriel, Garay, Gayya, Soler, Vass, Koklen, Parexo (Kondogbia, 65), Gedesh, Rodrigo (Diakabi, 88), Gameyro (Pichchini, 72).
Ogohlantirishlar: Gayya (53), Buskets (61), Kondogbia (70), Vidal (89).
