Bugun, 26 may kuni Qarshidagi markaziy stadionda Superliganing 10-turidan o‘rin olgan “Nasaf” – “Lokomotiv” bahsi bo‘lib o‘tadi.
Uchrashuv soat 19:00da boshlanadi. Quyida o‘yinga oid baʼzi maʼlumotlarni keltirib o‘tamiz.
“Nasaf”
– “Nasaf” turnir jadvalida 14 ochko bilan 5-o‘rinni egallab turibdi. Jamoaning to‘plar nisbati 14-9.
– Bugun “Nasaf” o‘z maydonida 6-uchrashuvini o‘tkazadi. Ortda qolgan besh o‘yinda qarshiliklar 3 marta g‘alaba qozonib, bittadan durang va mag‘lubiyat qayd etishdi.
– “Nasaf” o‘z uyida 10ta gol urib, 3ta to‘p o‘tkazib yuborgan.
– “Nasaf” oxirgi to‘rtta o‘yindan beri mag‘lubiyatga uchramayapti.
– Oxirgi to‘rtta bellashuvda Ro‘ziqul Berdiev shogirdlari uch marta g‘alaba qozonib, bir bor durang o‘ynashdi.
– “Nasaf” oxirgi ikki turni Qarshida o‘tkazib, “Qizilqum” bilan 1:1 o‘ynadi va “Qo‘qon-1912″ni 2:0 hisobida mag‘lub etdi.
– “Nasaf”ning eng yaxshi to‘purari Xumoyun Murtazoev bo‘lib turibdi, uning hisobida 7ta gol bor.
“Lokomotiv”
– “Lokomotiv” musobaqa jadvalida 18 ochko bilan ikkinchi o‘rinda boryapti. Jamoaning to‘plar nisbati 15-7.
– “Lokomotiv” shu paytgacha safarda 3ta o‘yin o‘tkazib, bittadan g‘alaba, durang va mag‘lubiyat qayd etdi.
– “Lokomotiv” safar o‘yinlarida uchta gol urib, o‘z darvozasidan ham shuncha gol o‘tkazgan.
– “Lokomotiv” oxirgi uchta o‘yinni durang bilan yakunladi. “Temiryoʼlchilar” safarda “Metallurg” va uyda “Qo‘qon-1912”, “Bunyodkor”ni yenga olishmadi.
– “Loko” oxirgi marta 6-turda g‘alaba qozongan. Jamoa o‘z maydonida “Qizilqum”ni 3:1 hisobida yengdi.
– “Lokomotiv” shu paytgacha “Nasaf”ga qarshi 28 o‘yin o‘tkazib, shundan 9tasida g‘alabaga erishgan.
– “Loko”ning Superligadagi eng yaxshi to‘purari Temurxo‘ja Abduxoliqov bo‘lib turibdi. Uning hisobida 6ta gol bor.
Oxirgi 5 o‘yin
2018 y. “Nasaf” – “Lokomotiv” 2:1
2017 y. “Nasaf” – “Lokomotiv” 2:0
2016 y. “Nasaf” – “Lokomotiv” 1:2
2015 y. “Nasaf” – “Lokomotiv” 1:0
2014 y. “Nasaf” – “Lokomotiv” 2:5
Qarshida bo‘lib o‘tgan oxirgi beshta o‘yinning uchtasida maydon egalari zafar quchgan. Shuningdek, ikki bor “Loko” g‘alaba bilan qaytgan. Hozircha durang qayd etilmagan. To‘plar nisbati 8-8.
