«Barselona» jamoasi sardori va klub tarixidagi eng kuchli futbolchi sanaladigan Leo Messi kecha mavsum yakunida klub muxlislariga murojaat qildi. U shu kunlarda terma jamoasi ixtiyoriga borib qo‘shilishidan avval, fanatlar armiyasiga aytgan so‘zlarini e’tiboringizga taqdim etamiz.

Bu mavsum biz uchun o‘ta qiyin o‘tdi. So‘nggi yillarda bizning klub og‘ir qadamlar bilan finishga yetib kelmoqda. Afsuski , biz YECHLda g‘olib chiqa olmadik. Men bu yerda o‘tirib shu gaplarni aytayotganimdan uyalib ketyapman. Darhaqiqat, biz bir necha yildan beri «shalpangquloq»ni «Kamp Nou»ga olib kelishni uddasidan chiqa olmayapmiz. Bu hozirda bizning asosiy muommolarimizdan biri! Muxlislarimizning ichki chempionatdagi g‘alabalarimiz qiziqtirmay qo‘ygan. Ular bizning xalqaro maydondagi yutuqlarimizni istashmoqda.

«Barselona» dunyoning eng qudratli klublaridan biri sanaladi. To‘g‘ri, hozirgi ahvolimizda bu so‘zga to‘liq mos tushmasligimiz mumkin, biroq bizning boy tariximiz va o‘z dunyoqarashamiz mavjud. Achinarlisi, 2 ta mavsumdan beri YECHLda qaqshatqich mag‘lubiyatga uchrab kelmoqdamiz.  Men uchun bunday mag‘lubiyatlarga uchrash sharmandali holat! Mavsum so‘ngida muxlislardan uzr so‘ramoqchi edim. Bu mening jamoa sardori sifatida o‘tkazgan ilk mavsumim edi va bu mavsum omadsiz yakunlandi. Hamma ayb va kamchiliklarni o‘z bo‘ynimga olaman va jamoamdan va uning yer yuzidagi barcha muxlislaridan uzr so‘rayman. Sizlar bunday natijaga loyiq emas edingiz.

Hammasini o‘z o‘rniga qaytarish uchun keyingi mavsum oldidan bizni katta o‘zgarishlar kutmoqda. Umid qilamanki, o‘zgarishlar biz uchun kerakli natijani olib keladi va keyingi mavsumda YECHLda aynan bizning klub g‘olib chiqadi.