Sosa Sola Superliganing 13-turidan o‘rin olgan «Dinamo» - «Bunyodkor» (1:2) uchrashuvidan keyin mehmonlar ustozi Vadim Abramov OAV xodimlarining savollariga javob qaytardi.

- O‘ylashimcha, hisob o‘yinga mos bo‘ldi. Stadionga tashrif buyurgan ishqibozlarga ham o‘yin ma’qul bo‘ldi, deb o‘ylayman. Samarqandda o‘ynash doimo zavq bag‘ishlaydi. «Dinamo» yaxshi, kelajagi bor jamoa. Bugun ham ko‘rdik, mezbonlar kuchli ishtiyoq evaziga harakat qildi, ayrim vaziyatlarda ularga tajriba yetishmadi.

Penalti? Fikrimcha, bu 100 foiz penalti. O‘ylashimcha, mezbonlar o‘z uyida yutqazgani uchun qiziqqonlik qilishyapti. Raqib bu yil hisobidan hali o‘z uyida yutqazmaganini bilardim. O‘z maydonida qanday o‘ynashini ham taxmin qilgandim va taxmin qilganimdek bo‘ldi. Shunchaki, biz o‘z darajamizda o‘ynamaganimiz va hali hisob 0:1 bo‘lib turganida vaziyatlardan foydalanmaganimiz sababli biroz qiynaldik. Qolaversa, keraksiz joyda o‘z darvozamizdan to‘p olib chiqdik. O‘yin oxirida omad biz tarafda bo‘ldi va g‘alaba to‘pini kiritdik.