Isroilning «Makkabi» (Petah Tikva) jamoasi yarimhimoyachisi Gidi Kanyuk ikkinchi davradan boshlab Toshkentning «Paxtakor» klubi sharafini himoya qiladi. Bu haqda GoSport.uz internet-nashri xabar bermoqda.

Ma’lumotlarga ko‘ra, Shota Arveladze petah tikvaliklar tarkibida ko‘p o‘yinlarda maydonga tushmayotgan futbolchini ortga qaytarishni istagan. Futbolchining o‘zi ham bunga rozilik bergan.

Kanyuk 2017 yilning iyulida ilk marta «Paxtakor» tarkibiga kelib qo‘shilgan va jamoa bilan 2,5 yillik shartnoma imzolagandi. Ammo 2018 yil boshida u avvaliga «Makkabi» (Tel-Aviv) jamoasiga ijaraga berildi. U yerda 5tagina o‘yinda maydonga tushgan futbolchi bitta gol urgandi. Keyinchalik u petax tikvaliklar tarkibiga borib qo‘shildi va u yerda 7 uchrashuvda 1ta gol urishni uddaladi.

Kanyuk «Paxtakor»da to‘p surgan yarim mavsumi davomida 14ta uchrashuvda maydonga tushib, 1ta gol kiritishga muvaffaq bo‘lgandi.