Italiyalik hujumchi Mario Balotelli ta’til paytida ham tinch yurmayapti. Neapolda dam olayotgan futbolchi mahalliy bar egasi bilan bahs boyladi.

Kelishuvga ko‘ra, bar xo‘jayini yarim yalanog‘och holatda o‘z mopedi bilan suvga sakrashi lozim edi. Bu ishni bajarsa, Mario unga 2000 yevro berishni va’da qildi.

Bar egasi esa 600 yevro turadigan mopedi bilan ushbu tryukni bajardi va futbolchidan 2000 yevroni qabul qilib oldi. Qiziq tomoni, moped suvga sho‘ng‘ib chiqqaniga qaramay, ishlashda davom etgan.

Ammo voqea shu bilan yakunlanmadi. Bundan xabar topgan mahalliy polisiya Balotellini jinoyat va azart o‘yinlarga majburlashda ayblamoqda. Bundan tashqari, ular atrof-muhitni ifloslantirgani uchun javob berishlariga to‘g‘ri keladi.

Mahalliy polisiya va hokimiyat bo‘lib o‘tgan ish yuzasidan prokuraturaga murojaat qildi. Endi Balotelli va bar egasi taqdirini Neapol prokuraturasi hal qiladi.

Mario Balotelli o‘tgan mavsumning ikkinchi yarmini "Marsel" safida o‘tkazib, 25ta o‘yinda 8ta gol muallifiga aylandi. Tomonlar yangi shartnoma borasida kelisha olishmagani bois, futbolchi jamoani erkin agent sifatida tark etdi. U hozir o‘ziga yangi jamoa qidirmoqda.