Bugun, 15 iyul kuni O‘zbekiston futbol assosiasiyasining navbatdan tashqari Konferensiyasi bo‘lib o‘tdi. Konferensiya kun tartibidan O‘FA Prezidenti, Vise-prezidentlar va Ijroiya qo‘mitasi a’zolarini saylash masalalari o‘rin olgan edi.
O‘zbekiston futbol assosiasiyasining prezidenti Ramatov Achilbay Jumaniyazovich o‘z xohishi bilan O‘FA Prezidentligidan iste’foga chiqish to‘g‘risida ariza berganligi munosabati bilan, O‘zbekiston futbol assosiasiyasi ustavining 41-moddasiga asosan O‘FA o‘z rasmiy veb-saytida O‘zbekiston futbol assosiasiyasi prezidenti lavozimiga O‘zbekiston futbol assosiasiyasi a’zolaridan nomzodlarini ilgari surish so‘ralgan edi.
Shu kunga qadar O‘zbekiston futbol assosiasiyasi prezidenti lavozimiga Toshkent shahar futbol assosiasiyasi tomonidan nomzod sifatida Azizov Abdusalom Abdumavlonovich taklif etildi va konferensiyada Azizov Abdusalom Abdumavlonovich bir ovozdan O‘zbekiston futbol assosiasiyasi prezidenti lavozimiga saylandi.
