«Bunyodkor»ning Minskdagi o‘quv-yig‘in mashg‘ulotlari davom etmoqda.

Murabbiylar shtabi yig‘inning oltinchi kunida futbolchilarni ertalab «trenajer zali»da shug‘ullantirgan bo‘lsa, tushdan so‘ng tiklanish uchun sauna va basseynga taklif qilishdi. Bir kun avval o‘rtoqlik uchrashuvi o‘tkazilgani hisobiga yig‘inning oltinchi kuni biroz yengil o‘tdi.

Bugun "qaldirg‘ochlar"  odatdagidek ikki mahal mashg‘ulot o‘tkazdi. Har ikkala mashg‘ulot ham maydonda olib borildi. Ertalabki mashg‘ulotlarda ham, tushdan keyingi mashg‘ulotning ma’lum qismida ham yigitlarga jismoniy yuklamalar berildi. Asosiy qismida esa, odatdagidek to‘p bilan ishlandi. Xursand qiladigan xabar shuki, Islomjon Qobilov bugundan e’tiboran umumiy guruhda shug‘ullanishni boshladi, «Smolevichi»ga qarshi bahsda jarohat olgan Suhrob Izzatov esa, yakka tartibda yengil tarzda yugurishga kirishdi.

"Bunyodkor" 22 iyul kuni tushdan keyin Toshkentga qaytadi. Rejaga ko‘ra, yig‘inning so‘nggi uch kunida uchta o‘rtoqlik uchrashuvi o‘tkaziladi. 19 iyul kuni BATE jamoasi o‘rinbosarlari, ertasi kuni Belorus chempionati oliy ligasi vakili «Dnepr» bilan kuch sinashiladi. Yig‘in doirasidagi so‘nggi o‘yin Rossiyaning «Smolensk» klubi bilan bo‘ladi. Shu uch o‘yindan so‘ng murabbiylar shtabi ko‘rikda bo‘lib turgan hujumchi, vinger Muhammad Diallo borasidagi oxirgi qarorga kelishadi.