AGMK jamoasi chempionatning ikkinchi qismiga jiddiy taraddud ko‘rmoqda.

AGMK jamoasining Superligadagi ikkinchi davra taqvimiga nazar tashlaydigan bo‘lsak, iyul oyi so‘nggida chempionat doirasida ikkita bahs ("Metallurg", "Andijon") o‘tkazamiz.

Kelasi oy avgustda chempionat doirasida ("Navbahor", "Paxtakor", "So‘g‘diyona") uchta, Liga Kubogi (chorak final) va O‘zbekiston kubogidagi (nimchorak final) ishtirokni inobatga olsak, yana kamida 2ta bellashuvda ishtirok etamiz. Agarda amaldagi g‘olibi bo‘lib turgan musobaqamiz O‘zbekiston kubogi nimchorak finalida zafar quchadigan bo‘lsak, unda avgustda qo‘shimcha yana 1 o‘yin o‘tkazamiz.

Kuz faslining dastlabki oyi sentyabrda esa chempionat doirasida uchta ("Dinamo", "Surxon", "Nasaf") bahs o‘tkazilishi rejalashtirilgan. Agarda O‘zbekiston kubogidagi (yarim final) ishtirok muvaffaqiyatli davom etsa, unda kuzning ilk oyida o‘yinlarimiz soni to‘rttaga yetadi.

Oktyabr oyida esa jamoamiz Superliga doirasida ikkita ("Bunyodkor", "Lokomotiv"), ehtimoliy O‘zbekiston kubogi (final) va Liga kubogidagi (yarim final) zafarli yurish natijasida jami 4ta o‘yin o‘tkazashimiz mumkin.

Noyabrda esa chempionat doirasidagi so‘nggi uchta ("Qo‘qon-1912", "Qizilqum", "Buxoro") o‘yin o‘tkaziladi. AGMK Liga Kubogi finaliga qadar borishni uddalasa, unda mavsumning so‘nggi qismidagi oyda o‘yinlarimiz soni bittaga ko‘payadi, ya’ni to‘rtta bo‘ladi.