Anvar Hafizov murabbiylik qilayotgan “Navbahor - U-21” yoshlar jamoasi 2-davra bahslariga jiddiy tayyorgarlik ko‘rmoqda.

Yoshlarimiz davralar oralig‘idagi o‘quv-mashg‘ulot yig‘inini 10-17 iyul kunlari Kosonsoyda o‘tkazishgandi.

Anvar Hafizov shogirdlari bugun Pro-Liga vakili, Shahrixonning “Rash-Milk” jamoasiga qarshi nazorat-sinov bahsi o‘tkazishdi.

Keskin kurashlar ostida kechgan mazkur o‘yinning 1-bo‘limida mezbonlar hisobni ochishga muvaffaq bo‘lishdi hamda tanaffusga 1:0 hisobidagi g‘alaba bilan chiqib ketishdi.    

Tanaffusdan so‘ng, Anvar Hafizov shogirdlari hujumkorlikni kuchaytirib, muvozanatni tiklashga harakat qilishdi hamda “Rash-Milk” darvozasi oldida bir qator xavfli vaziyatlarni yuzaga keltirishdi. Ammo ayrim vaziyatlarda maydon egalari darvozaboni o‘z mahoratini namoyish etib, xavfni bartaraf etgan bo‘lsa, ba’zi holatlarda yoshlarimizning zarbalariga aniqlik yetishmadi.

Bundan tashqari, yoshlar jamoamiz vakili Sherzod G‘ulomjonov qizil kartochka olib, maydonni erta tark etdi.

Natijada Anvar Hafizov shogirdlari yanada qiyin ahvolda qolishdi va endie’tiborni ko‘proq himoyaga qaratishga majbur bo‘lishdi.

Uchrashuv yakuniga qadar 1:0 hisobi o‘zgarmay qoldi hamda yoshlar jamoamiz ushbu ushbu o‘rtoqlik bahsida mag‘lubiyatni tan olishga majbur bo‘ldi.       

“Navbahor” PFK matbuot xizmati.