Анвар Ҳафизов мураббийлик қилаётган “Навбаҳор - U-21” ёшлар жамоаси 2-давра баҳсларига жиддий тайёргарлик кўрмоқда.
Ёшларимиз давралар оралиғидаги ўқув-машғулот йиғинини 10-17 июль кунлари Косонсойда ўтказишганди.
Анвар Ҳафизов шогирдлари бугун Про-Лига вакили, Шаҳрихоннинг “Раш-Милк” жамоасига қарши назорат-синов баҳси ўтказишди.
Кескин курашлар остида кечган мазкур ўйиннинг 1-бўлимида мезбонлар ҳисобни очишга муваффақ бўлишди ҳамда танаффусга 1:0 ҳисобидаги ғалаба билан чиқиб кетишди.
Танаффусдан сўнг, Анвар Ҳафизов шогирдлари ҳужумкорликни кучайтириб, мувозанатни тиклашга ҳаракат қилишди ҳамда “Раш-Милк” дарвозаси олдида бир қатор хавфли вазиятларни юзага келтиришди. Аммо айрим вазиятларда майдон эгалари дарвозабони ўз маҳоратини намойиш этиб, хавфни бартараф этган бўлса, баъзи ҳолатларда ёшларимизнинг зарбаларига аниқлик етишмади.
Бундан ташқари, ёшлар жамоамиз вакили Шерзод Ғуломжонов қизил карточка олиб, майдонни эрта тарк этди.
Натижада Анвар Ҳафизов шогирдлари янада қийин аҳволда қолишди ва эндиэътиборни кўпроқ ҳимояга қаратишга мажбур бўлишди.
Учрашув якунига қадар 1:0 ҳисоби ўзгармай қолди ҳамда ёшлар жамоамиз ушбу ушбу ўртоқлик баҳсида мағлубиятни тан олишга мажбур бўлди.
“Навбаҳор” ПФК матбуот хизмати.
