Joriy yilning 24-25 iyul kunlari Qashqadaryo viloyatida sportning dzyudo turi bo‘yicha ko‘rishda nuqsoni bo‘lgan bolalar uchun ixtisoslashtirilgan ta’lim muassasalari o‘quvchilari o‘rtasida O‘zbekiston chempionati bo‘lib o‘tdi.
Mazkur chempionat O‘zbekiston Respublikasi Jismoniy tarbiya va sport vazirligi, O‘zbekiston ko‘zi ojizlar jamiyati hamda O‘zbekiston Milliy Paralimpiya Assosiasiyasi tomonidan Qarshi shahrida joylashgan "Geolog" sport majmuasida o‘tkazildi.
Musobaqada mezbon sportchilardan tashqari Andijon, Namangan, Samarqand, Navoiy, Buxoro va Surhondaryo viloyatlaridan tashrif buyurgan 60 nafarga yaqin sportchilar 7 ta vazn toifasida o‘zaro kurash olib borishdi.
Qarshi shahrida o‘tkazilgan O‘zbekiston chempionati musobaqasi qizg‘in kurashlarga boy bo‘ldi. Umumjamoa hisobida 1-o‘rinni Buxoro viloyati sportchilari qo‘lga kiritgan bo‘lsa, 2-o‘rinni samarqandlik sportchilar egalladi. Faxrli 3-o‘rin esa mezbonlar jamoasiga nasib etdi.
Musobaqada g‘olib va sovrindorlar Jismoniy tarbiya va sport vazirligi tomonidan diplom, medal hamda esdalik sovg‘alari bilan taqdirlanishdi.
