Жорий йилнинг 24-25 июль кунлари Қашқадарё вилоятида спортнинг дзюдо тури бўйича кўришда нуқсони бўлган болалар учун ихтисослаштирилган таълим муассасалари ўқувчилари ўртасида Ўзбекистон чемпионати бўлиб ўтди.

Мазкур чемпионат Ўзбекистон Республикаси Жисмоний тарбия ва спорт вазирлиги, Ўзбекистон кўзи ожизлар жамияти ҳамда Ўзбекистон Миллий Паралимпия Ассоциацияси томонидан Қарши шаҳрида жойлашган "Геолог" спорт мажмуасида ўтказилди.

Мусобақада мезбон спортчилардан ташқари Андижон, Наманган, Самарқанд, Навоий, Бухоро ва Сурҳондарё вилоятларидан ташриф буюрган 60 нафарга яқин спортчилар 7 та вазн тоифасида ўзаро кураш олиб боришди.

Қарши шаҳрида ўтказилган Ўзбекистон чемпионати мусобақаси қизғин курашларга бой бўлди. Умумжамоа ҳисобида 1-ўринни Бухоро вилояти спортчилари қўлга киритган бўлса, 2-ўринни самарқандлик спортчилар эгаллади. Фахрли 3-ўрин эса мезбонлар жамоасига насиб этди.

Мусобақада ғолиб ва совриндорлар Жисмоний тарбия ва спорт вазирлиги томонидан диплом, медал ҳамда эсдалик совғалари билан тақдирланишди.