Superliganing 15-turida "Paxtakor" "Qizilqum" maydoniga safar uyushtiradi.

Mazkur uchrashuvda jamoalar tarkibida diskvalifikasiya tufayli yo‘qotishlar mavjud emas. "Paxtakor" asosiy tarkibida Akram Komilov va Javohir Sidiqovdan tashqari barcha futbolchi bo‘lajak bellashuvga hozirlik ko‘rmoqda.

Chempionatlar tarixida jamoalar 39 uchrashuvda maydonga tushishgan. O‘zaro o‘yinlar bo‘yicha ustunlik yaqqol "Sherlar" tarafida. 32 bahsda zafar quchgan "Paxtakor" 6 bor raqib bilan durang o‘ynagan va bir marta imkoniyatni boy bergan. "Qizilqum" darvozasiga 107 gol urilib, 23 to‘p o‘tkazib yuborilgan.

Yuqori liga tarixida qayd etilgan eng yirik natija - 11:0 hisobi jamoalarning Navoiyda 2007 yil o‘tgan bellashuvida kuzatilgan. O‘shanda "Paxtakor" mezbonlarni o‘ta yirik hisobda dog‘da qoldirgan. Ushbu mavsum birinchi davradagi bahsda esa Toshkentda jamoamiz 8:0 hisobida zafar quchgandi. Hozircha bu joriy yil uchun rekord natijadir.

"Qizilqum" va "Paxtakor" o‘rtasidagi uchrashuv 30 iyul, seshanba kuni soat 20:00da "Yoshlar" stadionida boshlanadi.