Суперлиганинг 15-турида "Пахтакор" "Қизилқум" майдонига сафар уюштиради.
Мазкур учрашувда жамоалар таркибида дисквалификация туфайли йўқотишлар мавжуд эмас. "Пахтакор" асосий таркибида Акрам Комилов ва Жавоҳир Сидиқовдан ташқари барча футболчи бўлажак беллашувга ҳозирлик кўрмоқда.
Чемпионатлар тарихида жамоалар 39 учрашувда майдонга тушишган. Ўзаро ўйинлар бўйича устунлик яққол "Шерлар" тарафида. 32 баҳсда зафар қучган "Пахтакор" 6 бор рақиб билан дуранг ўйнаган ва бир марта имкониятни бой берган. "Қизилқум" дарвозасига 107 гол урилиб, 23 тўп ўтказиб юборилган.
Юқори лига тарихида қайд этилган энг йирик натижа - 11:0 ҳисоби жамоаларнинг Навоийда 2007 йил ўтган беллашувида кузатилган. Ўшанда "Пахтакор" мезбонларни ўта йирик ҳисобда доғда қолдирган. Ушбу мавсум биринчи даврадаги баҳсда эса Тошкентда жамоамиз 8:0 ҳисобида зафар қучганди. Ҳозирча бу жорий йил учун рекорд натижадир.
"Қизилқум" ва "Пахтакор" ўртасидаги учрашув 30 июль, сешанба куни соат 20:00да "Ёшлар" стадионида бошланади.
