O‘zbekiston milliy terma jamoasi va BAAning “Sharja” klubi mohir yarim himoyachisi Otabek Shukurov "China Cup-2019" musobaqasida jarohat olganidan xabaringiz bor.

Ma’lum tanaffusdan so‘ng futbolchimiz yana mashg‘ulotlarga qaytdi. Ayni paytda uning jamoasi Gollandiyada yangi mavsumga hozirlik olib bormoqda. Futbolchimizning tez orada batamom tuzalib, yana terma jamoa va klubiga o‘zining mazmunli o‘yini bilan foyda keltirishiga umid bildiramiz.

Janubiy Koreya K Liga-2da 21-tur uchrashuvlari bo‘lib o‘tdi. Mazkur turda hamyurtimiz Rustam Ashurmatov faoliyat olib borayotgan “Gvangju” o‘zbekistonlik yana bir futbolchi Javlon Ibrohimov o‘ynayotgan “Suvon” bilan bahs yuritdi. Qiziqarli kechgan bellashuvda “Gvangju” 2:0 hisobida zafar quchdi va hisobidagi ochkolar sonini 48 taga yetkazib, musobaqa jadvalida yakkapeshqadamlik qilmoqda. Ushbu o‘yinda Ashurmatov 90 daqiqa maydonda harakat qilgan bo‘lsa, Ibrohimov zaxirada qoldirildi. Javlon Ibrohimovning “Suvon” klubi ayni paytda 30 ochko bilan 6-pog‘onada bormoqda.

Janubiy Koreya K Liga-1da faoliyat olib borayotgan O‘zbekiston milliy terma jamoasi yarim himoyachisi Ikrom Aliboyevning “Seul” klubi esa “Ulsan Xyonde” mehmoni bo‘lib, 1:3 hisobida imkoniyatni boy berib qo‘ydi. Uchrashuvda hamyurtimiz har galgidek o‘yinni boshlang‘ich tarkibda boshladi va 78 daqiqa o‘ynadi. Mazkur o‘yindan so‘ng “Seul” hisobidagi ochkolar 42tani tashkil etmoqda va jamoa musobaqa jadvalida 3-o‘rinni band etib turibdi.