O‘zbekiston Liga Kubogi chorak finali doirasidagi “Dinamo” – “Andijon” (2:1) uchrashuvidan keyin mezbonlar ustozi Davron Fayziyev o‘yin haqida to‘xtaldi.

- Bugungi uchrashuvda “Dinamo” ham, “Andijon” ham faqat g‘alaba uchun intildi. Raqiblarimiz “Andijon” jamoasi ham 90 daqiqa maydonda kurash olib borishdi. Yarim final yo‘llanmasi uchun bahs bitta uchrashuvdan iborat ekanligi bois, jamoalar ilk taymda ehtiyotkor, ikkinchi bo‘limda esa tavakkal qilishga majbur edim. Zero, uyda o‘ynayapmiz, gol urmasdan yutishni iloji yo‘q faqat va faqat oldinga borishimiz kerak edi va Bahodir Nasimov ikkita goli bilan zaxiradan tushib ishonchni oqladi. G‘alaba uchun butun jamoaga rahmat deyman.

O‘yin 90 daqiqa davom etdi va yigitlar oxirigacha kurashishdi. Muxlislarimiz ham “12-o‘yinchi” sifatida bizga katta kuch berishdi va yakunda yarim final yo‘llanmasini hal etdik.

Biz kubok bahslariga yilni boshidan jiddiy e’tibor qaratayapmiz, deya olaman. Endi yarim finalga chiqdik va bir qadamdan keyin finalga chiqishimiz mumkinligini yigitlarimiz ham to‘g‘ri tushunib turishibdi. Finalgacha bir qadam qolganda orqaga chekinish yo‘q. Oxirigacha kurashamiz. Shota Arveladze o‘tgan turda “Paxtakor”ning trebl qilish uchun kurashishi haqida aytdi. Shunga qaramay, biz ham kuchimizga ishonib, dastlab yarim finaldan o‘tishga intilamiz. Hozircha maqsadimiz finalga chiqish. Undan keyin nima bo‘lishi esa faqat Xudodan.

Usmon Ibodov yozib oldi.